Saria 100 milioigarren bidaiariari
100 milioi bidaia, 2023arekin alderatuta %8,6ko igoerarekin
Elixabete Etxanobe Landajuela
Presidentea
Bizkaia, gero eta lotutagoa
Gure garraio-sistema indartzeak berebiziko garrantzia du gure Lurraldearen kohesiorako, eta, gainera, funtsezko zutabea da gizarte-eredu jasangarriago baten eraikuntzarako.
Eta, hain zuzen ere horri begira, 2024. urtea etorkizunerantz zuzendutako urratsak ematen itxi dugu, pertsona guztientzako lurralde-oreka oinarritzat hartuta, eta horrek berekin dakar hainbat neurri abian jartzea, alegia, garraio publikoa sustatzeko eta aukera-berdintasuna bultzatzeko Planean sartutako neurriak, Bizkaiko pertsona guztien mugikortasunaren esparruan, bizi diren eskualdea zeinahi delarik ere.
Izan ere, metroa ez da mugitzeko baliabide bat soilik, zeren horrez gain faktore erabakigarria baita pertsonen bizi-kalitaterako, ingurumen-aztarnaren murrizketarako eta ekonomia bidezkoago eta irisgarriagoaren bultzadarako.
Azken batean, Metro Bilbaok horri begira jokatzen duen rola funtsezkoa da, zeren lagungarria baita mugikortasunaren deskarbonizaziorako, irisgarritasun integratzailearen alde arituz, eta, hortaz, Bizkaia gero eta lotutagoa izatearen alde eginez.
Eneko Arruebarrena Elizondo
Zuzendari Nagusia
Urte bikaina
2024. urtea bikaina izan de Metro Bilbaorentzat. %8,6ko hazkundea izan dugu aurreko urtearen aldean, eta ehun milioi bidaiaren maila gainditu dugu: mugarri berri bat gure historian, agerian uzten duena bai herritarren mugikortasun-behar aldakorretara egokitzeko dugun gaitasuna eta bai lanaren zein aisialdiaren arloetan dugun garrantzia.
Bizkaiak kultura- eta kirol-ekitaldi garrantzitsuak hartu ditu urtean zehar, eta zita horiek finkatu egin dute metroak funtsezko zerbitzu gisa lurraldean jokatzen duen rola. Izan ere, metroa izan zen lehenetsitako garraiobidea Gabarrak gure itsasadarra zeharkatu zuen egunean: milioi bat pertsona baino gehiago kalean, Athleticen garaipena ospatzen.
Horizontean baditugu tren berriak, seinaleztapen-sistemaren bilakaera eta Aginte Toki Nagusiaren modernizazioa. Mugarri hauekin, datuek agerian uzten dute erabiltzaileek Metro Bilbaon jartzen duten konfiantza, eta, horrez gain, indartu egiten dute jasangarritasunarekin eta etengabeko hobekuntzarekin hartuta dugun konpromisoa, Bizkaiko mugikortasunaren funtsezko ardatza izaten jarraitzeko.
Metro Bilbao, S.A.ko Administrazio Kontseilua
| Elixabete Etxanobe Landajuela |
| Luis Pedro Marco De La Peña*** |
| Juan Maria Aburto Rique |
| Amaia Aguirre Muñoa |
| Asier Iragorri Basaguren |
| Sonia Pérez Ezquerra |
| Miguel De Los Toyos Nazabal* |
| María Dolores De Juan De Miguel |
| Hernando Lacalle Edeso* |
| Josu Iñaki Garay Ibañez De Elejalde |
| José Enrique Corchón Álvarez ** |
| Miguel Ángel Páez Escamendi ** |
| Roberto Muñoz García |
*2024ko irailaren 26ra arte
**2024ko irailaren 26tik
***2024ko azaroaren 28ra arte
Metro Bilbaoren erakunde-arduraren politika GIH guztien, 17en inguruan egituratuta dago, bereziki «Hiri eta komunitate iraunkorrak» helburuari begira, gure lurraldean mugikortasun jasangarria eta inklusiboa errazteko bitartekoa garelakoan.
Metro zerbitzua
100.363.551
bidaia bete genituen (%86, igoera)
2024. urtea ehun milioi bidaiarekin baino gehiagorekin itxi genuen, eta, hortaz, Bizkaiko garraio publikoaren erreferente gisa finkatu ginen.
Mugikortasun gehiago aisialdiagatik
Zehazki, ehunekotan adierazita, igoera nagusia asteburuetan eta jaiegunetan gertatu zen, lanegunekin alderatuta; azken horietan, berriz, igoera handiena arratsaldeetan nabaritu zen. Azpimarratzekoa da egun esanguratsu batzuen eragina, hala nola Errege Koparen tituluaren ospakizuna, apirilaren 11n, egun horretan gure historiako bidaia kopururik handiena erregistratu baitzen: 485.997 balidazio.
Bezeroen balorazioa
Gure metro-zerbitzuaren balorazioak hobera egin zuen: 8,2 puntu 10 puntutatik. Gure bezeroen % 95ek esan zuen harro zegoela garraiobide honetaz; ehuneko hori 2023koa baino bi puntu handiagoa da, eta balio historiko handienetako bat ere bada.
Azterlanean ikusi zenez, erabilera trinkoa egiten duten pertsonen kopuruak gora egin zuen, bai lanegunetan eta bai asteburuetan. Izatez, hamar bidaiaritatik seik astelehenetik ostiralera erabiltzen dute, eta laurdenek esaten dute asteburuetan erabiltzen dutela.
Metro Bilbaon lanegunetan bidaiatzen duten pertsonen gehiengoak (% 71) bi bidaia egiten ditu egunean (joan eta etorri); % 14k lau bidaia egiten ditu, eta % 9k bakarra. Joan-etorri horiek egiteko arrazoi nagusia lana da (horrela adierazten du inkestatutako pertsonen % 45ek), eta horren ostean ikasketak (% 16) eta aisialdia (% 12).
Garbitasuna eta azkartasuna izan ziren metroa garraiobide gisa aukeratzeko arrazoi nagusiak.
Puntuazio handienak jaso zituzten atributuek honako hauek izan ziren:
Geltokien garbitasuna
Barik
Trenen garbitasuna
Azkartasuna
Puntualtasuna
Geltoki guztietan doako wifia jartzen amaitu dugu
Doako wifia sareko 42 geltokietan instalatzen amaitu dugu. Zerbitzuak ahalbidetzen du telefonoetatik eskuragarri dagoen sarera sartzea eta 15 minutuko doako konexioa izatea, honako hau egin ahal izateko: albisteak eta mezu elektronikoak irakurtzea, sarea sozialak erabiltzea… eta, era horretan, geltokietako itxaronaldi laburra aprobetxatzea.
Konexio gehien kontzentratu zituzten geltokiak honako hauek izan ziren: Zazpikaleak/Casco Viejo, Abando eta San Ignazio; eta konektatutako gailuen hizkuntzak honako hauek: gaztelania, ingelesa, frantsesa, alemana eta, jakina, euskara.
Abisuak emateko pantaila digital berriak
Teknologia berrien hedapena nasetan abisuak emateko pantaila digital berrien estreinarekin bultzatu zen. Aspalditik landutako ekimen bat da, behar estetikoei eta ordutegiei, barrutiko mapei eta “Horrela funtzionatzen du metroak” azalpenari buruzko paperezko panel tradizionalekin modu harmoniatsuan uztartzeko beharrei egokituta ezarri zena.
Lehenengo lau pantailak instalatu ziren, proba moduan, Abando eta Zazpikaleak/Casco Viejo geltokietako bi bideetako nasen erdiko posizioan. Gainera, bosgarren pantaila batek Indautxuko ordutegien kanpo-panela okupatzen du. Kasu horretan, distira kaleko argiaren baldintza aldakorretara egokitu zen. Fase pilotuak urte erdiz iraun zuen, eta beste geltoki batzuetan ere ezartzea baloratzen ari da.
Abisuen panela teknologia digitalera pasatzeak abantaila ugari ditu. Bisualagoa eta erakargarriagoa izateaz gain, animazioa duten sorkuntzak ahalbidetzen ditu, eta saihesten du geltokietak ikuskatzaile-kolektiboak kartelak behin eta berriz jarri behar izatea. Orobat, euskarri berriak ahalbidetzen du edukiak tartekatzea, beharrezkoa izanez gero, eta baita zerbitzuaren balizko egoera degradatuez ere informatzea.
Metro irisgarria eta jasangarria
Navilens seinaleztapena
Aurrera egiten dugu ikusmen-desgaitasuna duten pertsona guztien irisgarritasunean, Navilens aplikazioa sare osora hedatzearen bidez. Era horretan, edozein motatako ikusmen-desgaitasuna duten pertsonak gidatzea ahalbidetu zen.
ONCErekin batera hasieran garatutako proiektu pilotuaren ostean, seinaletika hau sare osora hedatu zen, informazioa eskainiz bai mezzaninako teleadireazleetan eta bai nasetan instalatutakoetan. Era horretan, pertsona horiek bertatik bertara ezagutu dezakete -adibidez- zenbat minutu falta diren trenak pasatzeko, zenbat kotxe dituen tren bakoitzak edo une horretan ematen ari diren abisuak.
Jarraitu irakurtzen
Metro irisgarria eta jasangarria
Sare-mapa irisgarri berriak inplementatu ziren geltoki guztietan
Metro Bilbaok, Bizkaiko Garraio Partzuergoaren lankidetzarekin, garraiobide publikoen arteko konexioen maparen diseinua eguneratu zuen, berau irisgarria izan dadin pertsona guztientzat, etengabeko hobekuntzaren eta irisgarritasun unibertsalaren bidean aurrera egiteko xedez. Horretarako, informazioan eta komunikazio inklusiboan espezializatutako enpresa eta kolektiboen lankidetza izan zuen.
Jarraitu irakurtzen
Metro irisgarria eta jasangarria
Hogei bat geltokitan esku hartu zen, nasen eta trenen arteko irisgarritasuna hobetzeko
Ekimen horiei esker, trenaren eta nasaren artean -altuera eta espazio aldetik- geltoki batzuetan zegoen diferentzia gainditu zen.
Jarraitu irakurtzen
Metro irisgarria eta jasangarria
Piktograma irisgarriagoak
Lan-saio bat eman zitzaion Gorabideri -desgaitasun intelektual duten Bizkaiko pertsonen aldeko elkartea-. Topaketa Bilbon egin zen eta helburua izan zen piktograma irisgarriak metroaren sarean definitzea.
Metro Bilbaok eskertu nahi du Gorabidek gai honetan eskainitako ezinbesteko lankidetza, eta baita osoko inklusioaren aldeko Euskadiko FEVAS plataformaren gainerako erakunde bazkidetuena ere.
Jarraitu irakurtzen
Metro irisgarria eta jasangarria
Metro jasangarria
77,2 milioi kotxeren zirkulazioa saihestu zen, energia berdea % 100ean erabiliz.
Halaber, honako ziurtagiri hauek lortu ziren:
- Energiaren kudeaketaren AENOR auditoria: ISO 50001.
- Ingurumena kudeatzeko sistemaren AENOR auditoriak, ISO 14001 arauaren eta EMAS adierazpenaren arabera.
Pertsonak
Lantaldea
| Emakumeak | Gizonak | Guztira | |
| Zuzendaritza Nagusia | 1 | 1 | 2 |
| Komunikazioa eta Markaren-garapena | 6 | 1 | 7 |
| Administrazioa eta Segurtasuna | 8 | 13 | 21 |
| Bezero eta Gizarte-berrikuntza | 19 | 5 | 24 |
| Pertsona-ondarea | 15 | 15 | 30 |
| Teknikoa | 21 | 212 | 213 |
| Operazioak | 205 | 313 | 518 |
| Guztira | 275 | 560 | 835 |
Lana eta familia uztartzea
| Murrizketa-mota | Emakumeak | Gizonak | Guztira |
| Lege-zaintzako lan-murrizketak (art. 37,5 ET) | 78 | 46 | 124 |
| Lanaldi-murrizketa boluntarioak (MB barne araudia) | 18 | 9 | 27 |
| 2024ko murrizketak, guztira Portzentaia |
96 %63,58 |
55 %36,42 |
151 %100 |
Prestakuntza
Iaz, prestakuntza eskaintzen jarraitu genuen, eta harrera ona egin zioten langileek.
Prestakuntza-ekintzak
Orduak guztira
Orduak/pertsonak, batez beste
Gogobetetze-indizea
Hizkuntza-kudeaketa
Haur eta gazteentzako euskal literaturari balioa emateko, Metro Bilbaok “Bazen behin…” erakusketa estreinatu zuen udazkenean. Esposizio horrek 20 panel zituen, euskarazko liburuen idazleen eta ilustratzaileen lanak ezagutarazteko. Bost geltokitan ipini ziren: Zazpikaleak/Casco Viejo, Moyua, Indautxu, Santimami/San Mamés eta Deustu.
“Erakusketa hau Metro Bilbaoren DNAren parte gisa ulertzen dugu. Irakurketaren, gure hizkuntzaren eta gure gizartearekin konprometitutako garraiobide baten arteko topagune bihurtzeko jartzen dugu martxan”, nabarmendu zuen Eneko Arruebarrena Zuzendari Nagusia.
Berdintasuna
Metro Bilbaoren genero berdintasunarekiko estrategia 2024-2026 aldirako VII. Berdintasun Planean islatzen da.
Metroaren Eguna
Urriaren 5a oso egun berezia izan zen langile guztientzat. Egutegian gorriz markatutako data horretan, jaiegun handi bat ospatu zen hiri inguruko familia osatzen dugunontzat.
Diziplina anitzeko ekitaldi horretan, adin guztietarako jarduerak eta tailerrak eskaini ziren egun osoan: abentura-parkea, ludoteka, haurrentzako trenbidea, igel- eta futbolin-txapelketak, tonbola eta musika-animazioa. Era berean, gure instalazioak ezagutarazteko baliatu zen aukera hori.
Enpresen lasterketa
Metro Bilbao iaz ere ordezkaturik egon zen Enpresen lasterketan. Kasu hartan, hiru talde izan ziren: bi gizonezkoenak eta bat emakumezkoena. Neskek lortu zuten berriz ere sailkapen onena: zortzigarren amaitu zuten 32 parte-hartzaileren artean, 43 minutu eta 53 segundoko denborarekin. Mutilek, bestalde, 20. eta 38. postuetan amaitu zuten guztira 156 talderen artean: 33:27 eta 36:37 denborekin, hurrenez hurren.
Emaitzek beste behin ere berresten dute maila handia dutela gure korrikalariek, nahiz eta benetako helburua beste bat izan: ondo pasatzea kirola egin bitartean.
Futbol 7
Metro Bilbaok talde misto bat eduki du futboleko 7ko Enpresen arteko Ligan, plantilla osoarentzat zabalik. Ekimen hori aukera-berdintasunaren alde eginiko lanaren erakusgarri da, eta, era berean, sendotu egiten du inklusioaren aldeko gure konpromisoa, esparru guztietan, baita kirolean ere.
Enpresen arteko Ligan parte hartzea aukera bikaina da ohitura osasungarriak eta talde-lana bultzatzeko. Baina, horretaz gainera, Metro Bilbaok irmo defendatzen dituen balioak erakusten ditu: genero-berdintasuna eta langile guztiak integraturik aritzea gure jardueretan.
Instalazioak eta trenak
Etorkizuneko metroa: trenen flota berritzea
Imanol Pradales lehendakaria eta Elixabete Etxanobe Bizkaiko ahaldun nagusia Metro Bilbaoren mantentze-lanetarako kotxetegietan izan ziren Sopelan uztailaren 8an, eta Metro Bilbaoko flota berritzeari buruzko xehetasunak eman zituzten.
Berrikuntza estrategiko bat da, etorkizunera begira Bizkaiko garraio publikoaren sistema indartzera bideratua. Ia hiru hamarkada lurraldea egituratzen eman ostean eta 100 milioi erabiltzaile gainditu eta gero, bi administrazioek etorkizuneko metroa prestatzeko garaia iritsi dela zioten.
Elixabete Etxanobe Bizkaiko ahaldun nagusi eta Metro Bilbaoren presidenteak eta Imanol Pradales lehendakariak aurreikusitako prozeduraren berri eman zuten: batetik, 37 unitate ordeztea, zerbitzuaren edukiera % 12 handitzeko; bigarrenik, seinaleztapen-sistema modernizatzea, CBTC sistema ezarrita, eta, horri esker, segurtasuna, automatizazioa eta erantzuteko gaitasuna hobetzea; eta, hirugarrenik, egungo aginte-postua eguneratzea.
Jarraitu irakurtzen
Instalazioak eta trenak
Arizko aginte-postu erredundantea abian jartzea
Errealitate bihurtu zen Arizko aginte-postu erredundantea. Aginte Postu Nagusia egoitza zentralekoa izango da aurrerantzean ere, baina, bigarren postu horri esker, hauxe bermatuko dugu: Nafarroa kaletik zerbitzua ematea ezinezkoa denean, Arizetik egin ahal izatea. Hala, beti ziurtatuko dugu metro-zerbitzua.
Arizko aginte-postu erredundantea jasotzeari begira, bi jardunaldi egin ziren. Haietan, Arizko aginte-postutik jardun zen 24 orduz bi alditan: azaroan eta abenduan, hain zuzen ere.
Arizko aginte-postu erredundantetik edo Nafarroa kalekotik zerbitzua emateak ez du eskatzen inolako aldaketarik lan-tresnen ezagutzari dagokionez, eta ez du eskatzen aldaketarik aginte-postu erredundanteko langileen eragiketa-kudeaketan ere. Hala ere, aginte-postu erredundantearen arkitektura eta beste alderdi tekniko batzuk ezagutarazteko, sistema erredundante berriaren gaineko prestakuntza emango zaie aginte-postu errenduntateko langileei garapen profesionaleko jardunaldietan.
Instalazioak eta trenak
Hobekuntzak eskailera mekanikoetan
Instalazioen arloak zenbait hobekuntza bultzatu zituen geltokietako eskailera mekanikoetan, erabilera errazteko eta EN 115-2 segurtasun-araudira egokitzeko. Hobekuntza guztietan deigarriena izan da argi estroboskopiko bat ipintzea tarte bakoitzeko treneratze- eta lurreratze-eremuetan. LED teknologiako argi berde horren helburua da mailaren ingurua nabarmentzea, erabiltzailea bisualki gidatzeko eta behar bezala kokatzen laguntzeko. Sistema lehendik ere ezarrita zegoen Basaurin, Arizen eta Kabiezesen, eta sareko gainerako tokietara zabaldu zen.
Bigarren aldaketa handia izan da eskailera mekanikoetako Stop eskuleku zaharren ordez funtzio bera duten sakagailu sinple batzuk ipintzea. Eredu berria inklusiboagoa da, bezeroek errazago eragiteko modukoa, eta, horretaz gainera, badu beste onura bat ere: txikiagoa da eta gutxiago nabarmentzen da zutoinetik. Berrikuntza horietaz aparte, ohiko mantentze-lanak ere egin dira. Hori horrela, eskaileretako argiztapena hobetu zen Sestaon, Portugaleten eta Peñotan, eta, aldi berean, Moyua geltokiko oinezkoen estalkiak eta Zazpikaleak/Casco Viejo geltokiko korridore gurpildunak berritu dira.
Instalazioak eta trenak
Mantentze-lanen abangoardian
Teknologia eta berrikuntza batera doaz Metro Bilbaok bere ibilgailuak ondo kontserbatzearen alde egindako apustu irmoan. Trenak etengabe zaintzen eta monitorizatzen dira trenbidean instalatutako sistema eta ekipamenduen bidez (Way Sides izenez ezagutzen dira), eta, horri esker, aldez aurretik detektatzen dira anomaliak, egin beharreko doikuntzak egiteko. Horrek segurtasuna areagotzen du, eta asko aurrezten da kostuetan eta denboran. Mantentze-lan prediktiboa deitzen zaio horri. Eremu horretan, oraindik ere asko dago esploratu gabe eta gure enpresak modu proaktiboan jarduten du.
Erreiari atxikitako sentsore bakunen bidez, gurpil bakoitzaren karga-pisua erregistratzen da unitateak igarotzean. Pisatze dinamikoko sistema deitzen zaio horri. Neurketa orduko 65 kilometroko abiaduran egiten da. Horri esker, desorekak identifikatzen eta horien kausak zuzentzen dira, eta, hala, aurrea hartzen zaie sor litezkeen arazoei.
Jarraitu irakurtzen
Instalazioak eta trenak
Erreferentzia berrikuntzan
Iñigo Ortuondo zuzendari teknikoak gure enpresaren lorpen teknologiko handiak laburbildu zituen Sener etxeak gonbidatutako hitzaldi batean, zeinaren xedea baitzen sormena eta ideia berriak sustatzea ingeniaritza-enpresa ospetsu horretako langileen artean.
Alberto Plano Material Mugikorreko ingeniariak lagunduta, Metro Bilbaoren mugarriak aurkeztu zituen modu kronologikoan, hala nola Olabeagako ibai-azpia urpeko kaxa handien bidez eraikitzeko sistema, telefonia mugikorreko estaldura duen lehen metroa izatea, trenen balaztaketarekin energia berreskuratzeko Ingeber sistema, eta zirkulazioan martxa efizienteak ezartzea. Lorpen berrienen artean, gure zuzendari teknikoak trenbidea auskultatzeko eta silize kristalinoa kentzeko eginiko ahaleginak aipatu zituen, baita Medusa proiektua ere, Bilbobuseko autobus elektrikoak gure soberakin energetikoarekin kargatzeko.
Instalazioak eta trenak
Buenos Airesko EMOVA enpresaren bisita
Jose Lupinacci (EMOVA Buenos Airesko metroaren emakidaduneko Mantentze Lanetako eta Ingeniaritzako zuzendaria), eta Begoña Amezaga eta Unai Olabarria (Voestalpine JEZeko langileak) Nafarroa kaleko gure instalazioetan, geltoki batzuetan, Arizko tailerrean eta Sopelakoan ibili ziren, eta bertatik bertara ezagutu zituzten aginte-postu erredundantea, azpiegitura, eta trenbidea eta azpiegiturak mantentzeko sistematika.
Jardunaldi hartan, Iñigo Ortuondo zuzendari teknikoa eta José Ángel Izquierdo Azpiegitura eta Proiektuen nagusi izan ziren talde hari laguntzen, eta azpiegiturekin eta bideak mantentzearekin loturiko xehetasunak aurkeztu zizkieten.
Instalazioak eta trenak
Metro Bilbao, Garraioaren eta logistikaren sektoreko mantentze-lanei buruzko XVII. Jardunaldietan
Urrian, Garraioaren eta logistikaren sektoreko mantentze-lanei buruzko XVII. Jardunaldiak izan ziren Bilboko Itsas Museoan, Espainiako Mantentze Lanen Elkarteak antolatuta (AEM, gaztelaniazko siglen arabera). Jardunaldi horietan, Material Mugikorraren Ingeniaritza saileko Alberto Plano Morillo lankideak parte hartu zuen, mantentze-lanak digitalizatzeari buruzko hitzaldi batekin.
Jardunaldi horien arretagunea izan zen beharrezkoa dela garraiobideek egungo digitalizazio eta deskarbonizazio beharretan eta erronketan sakontzea (bidaiariak, logistikoa eta ontzigintzakoa), bai eta horiei lotutako logistikan ere. Ildo horretan, arreta berezia ipini zieten arazoen eta aplikatu beharreko soluzioen berrikuntzari, garapenari, trebakuntzari eta transbertsalitateari.
Instalazioak eta trenak
Mondragon Unibertsitatea
Sistemetako gure lankide Ruben Arrizabalagak Mondragon Unibertsitateko As Fabrik fakultatea bisitatu zuen, eta “Metro Bilbaoren digitalizazioa” hitzaldia eman zuen. Hala, metroan erabiltzen diren sistemetatik gaur egun digitalizatzen ari diren prozesuetara iritsi arte izaniko ibilbidea azaldu zuen, eta, horrekin batera, garai berriek ekarriko dutenaren aurreikuspena egin zuen. Digitalizazioaren abantailak eta desabantailak ere jorratu zituen, eta bereziki azpimarratu zuen zibersegurtasunaren garrantzia.
Instalazioak eta trenak
Larrialdietarako koordinatzea
Gure funtzio nagusia pertsonak garraiatzea denez, ondotxo dakigu zelako erantzukizuna daukagun. Horregatik, urte osoan prestatzen gara balizko edozein gorabehera edo larrialdiri erantzun ahal izateko. Horren adibide bat da, esaterako, Basaurin eginiko simulazioa: tren bat errailetik ateratzea eta ondoren su hartzea. Tankera horretako ariketetan, egiaztatzen dugu, batetik, gaitasuna dugula halako istripu batean erantzuteko, eta, bestetik, ondo koordinatuta jarduten dugula larrialdi-zerbitzuekin (Ertzaintza, Osakidetza, Bizkaiko Foru Aldundiko suhiltzaileak, Udaltzaingoa eta SOS Deiak).
Jarraitu irakurtzenMetro bat baino gehiago
‘Ez molestatu’ kanpaina
“Ez dut entzun nahi zure zarata”, “Ez ditut entzun nahi zure bideoak”, “Ez dut entzun nahi zure berriketa”. Argia eta zuzena da mezua. Metro Bilbaok ondotxo daki errealitate hori gogaikarria dela bezeroentzat. Hori ikusirik, kanpaina bat abiarazi zuen hiru hizkuntzatan: tonu alaian, gogorarazten du beharrezkoa dela entzungailuak erabiltzea, ozen berba ez egitea, eta trenez bidaiatzen duten pertsonak errespetatzea.
Agate Deunaren koruak
Agate Deunaren ohiko ospakizunarekin bat egin genuen, eta zenbait abesbatzaren emanaldiak izan ziren instalazioetan. Bilbo, Barakaldo eta Getxoko hiru abesbatza aritu ziren kantuan 11:00etatik 13:00etara; hala, bidaiariak animatu zituzten beren errepertorioko hainbat herri-abestirekin —horien artean, jakina, Agate Deuna—. Arratiako Korua ere bisitan izan genuen, urtero bezala.
Moyua, San Mamés giroan jantzita Kopako finalerako
Kopako finala zela eta, zenbait ekintza antolatu ziren Athletici laguntzeko. Moyuako geltokia nabarmendu zen; izan ere, zuri-gorriz jantzi zen San Mamés futbol-zelaia birsortzeko. Ia 2.000 metro koadro hartu zituen, ekimen original horri forma emateko: modu biziki fidelean erreproduzitu zuen Katedralean bizi ohi den giroa.
Metro Kultura
Lankidetzan antolatutako kultura-agenda bateratu bat da, doakoa eta hilerokoa. Formatu digitalean ez ezik, paperean ere eskura daiteke geltokietako erakustokietan.
Underrun
270 kirolarik baino gehiagok arrakastaz eta jai-giroan amaitu zuten Underrun lasterketaren bigarren edizioa.
Metro Bilbaoren trenbideetatik barrena ia zortzi kilometroan egindako lasterketa berezi hori Moyua eta Ansio geltokien artean igarotzen da, eta bizia eraman zuen metroaren tuneletara gau-partean.
Bat egin genuen LGTBIQ+ Harrotasunaren Egunarekin
Abando geltokian ospatu genuen efemeride hori, inklusioa eta berdintasuna sustatzeko gure enpresa-balioei jarraikiz. Geltoki horretan, panelak ipini eta bankuak apaindu ziren, Bilbao Bizkaia Harro jaialdiari loturiko motiboekin. Hamargarren edizioa izan zuen aurten jaialdi horrek.
Aste Nagusiko kanpaina
Gargantua instalatu zen Moyuan. Zehazki, Ercilla eta Elkanoko fosteritoetan; hantxe eman zuen Aste Nagusia, Bilbo erdiko Moyua plazan.
Bi fosterito horiek Bilboko jaietako ikono enblematiko bilakatu ziren, eta paretik igarotzen ziren milaka pertsonaren arreta erakartzen zuten egunero.
Gabonetako kanpaina
Metro Bilbaoko hogei bat geltoki galaz jantzi ziren Eguberri-jaiak ospatzeko: Gabonetako zuhaitzak, etxeko txikiek Olentzero eta Errege Magoei gutunak bidaltzeko postontziak, eta are Olentzeroren irudiak mastetan, Mari Domingi eta galtzagorri dibertigarriak alboan dituela, teleadierazleetatik agur eginez.
Metro Bilbaok ikasleen bisitak jaso zituen berriro
Ikastetxeen bisitak irailean itzuli ziren Metro Bilbaora. Bisita horien helburua da gure instalazioak erakustea, bai eta gure enpresaren funtzionamenduaren berri ematea ere, Bizkaiko garraio publikoaren ardatz egituratzaile gisa.
Metroa zenbakitan
Sarea
Ibilgailuak
Eskaria eta kudeaketa
Ekonomikoak