Sare-mapa irisgarri berriak inplementatu ziren geltoki guztietan

Metro Bilbaok, Bizkaiko Garraio Partzuergoaren lankidetzarekin, garraiobide publikoen arteko konexioen maparen diseinua eguneratu zuen, berau irisgarria izan dadin pertsona guztientzat, etengabeko hobekuntzaren eta irisgarritasun unibertsalaren bidean aurrera egiteko xedez. Horretarako, informazioan eta komunikazio inklusiboan espezializatutako enpresa eta kolektiboen lankidetza izan zuen. 

Hori lortzeko, azterketa- eta hobekuntza-prozesua metroko geltokietan bertan hasi zen, planoaren erabilera aztertuz. Letraren mota eta tamaina eguneratu ziren, irakurgarritasuna hobetzeko, eta piktograma berriak garatu ziren metroaren erabileraren gaineko ulermena errazteko eta hori modu autonomoan egiten laguntzeko.

Gainera, planoak badu Map’s Voice teknologia: plataforma digital bat, inprimatutako QR kode komun baten bitartez informazioa zabaltzen duena, berau irakurri edo entzun dadin, hainbat hizkuntzatan, euskarazko eta gaztelaniazko irakurketa erraza barne sartuta.